Unexpectedly Eastwood

Hi!! Nitong nakaraang Miyerkules, ika-6 ng Hunyo, ay nagkayayaan manood ng sine at ang napagkasunduan ay Ocean's 13. Pito kaming magkakasama (Ako, Marc, Alvin, Reya, Charm, Augie at Mizpah). Gaya ng dati, pahirapan maka-isip kung saang sinehan manonood. Humantong sa dalawa ang pinagpilian, Gateway o Eastwood. Mula sa dalawang iyon ay Eastwood ang napili sa hindi malamang kadahilanan. Pumunta kami doon sakay ng kotse ni Charm.

Mga lampas alas-7 na kami nakarating sa Eastwood, Libis dahil na rin nagkaroon ng ARM meeting bago iyon. Upang maaga-aga makauwi dahil balak pa ni Alvin umuwi ng Cavite, pinili na namin yung pinaka-maagang timeslot na posible. Nag-light and quick meals lang kami upang hindi naman magutom habang nanonood. At dahil opening ng palabas nung araw na iyon, swerteng may bakanteng upuan pa kami nakuha bagamat nasa last row kami.

Pagkatapos manood ay hindi na naman uli malaman kung ano na ang susunod na gagawin. At ayun, napagkasunduan na kumain uli ng mas-hard.

-- to be continued --

Version 3.5

Hi!! At dahil naging "abala" ako sa mga bagay-bagay nitong nagdaang 2 buwan at nandyan pa yung pagkawala ng linya namin ng telepono at DSL ng halos isang buwan, naging inactive o dormant ang aking blog na ito.

Pero kasabay ng pag-full format ng aking PC ay ang pagbabalik ng aking blog! Yehey! Yahoo! Version 3.5 ang bago kong tawag dahil 2 buwan naging inactive nga ang blog na ito at halos wala pa rin magiging pagkakaiba ito sa previous version (v3).

Binago ko rin ang tagline ng blog ko sa "Smile, always!" dahil sa hirap ng buhay ngayon at sa sari-saring problemang kinakaharap, kailangan natin manatiling maging optimistic at maging masaya sa kabila ng mga paghihirap. At tugma rin ito sa aking pananaw sa buhay (as depicted in my personal quotes in "IN: Ika nga...").

Naglagay rin ako ng Philippine flag sa gilid bilang testamento ng aking pagiging Pilipino at ipinagmamalaki ko ito saan man sa mundo!

At dahil nagsimula na ang panahon ng tag-ulan, rainy season motif ang blog background ko ngayon. Trademark na ng blog ko simula Version 1 na seasonal ang aking blog backgrounds. Pagdating siguro ng Setyembre o Oktubre magbabalik ang background sa ordinary season at pagdating naman ng Disyembre at Enero ay Christmas and New Year Seasons respectively.

Enjoy and smile, always!

Instant Overnight

Hi!! Kahapon ay nagkaroon ng General Cleaning at FOPC Workday sa tambayan. Inabot kami ng hanggang 6:30 ng gabi. Pagkatapos ay nagkayayaan kami na kumain sa Bora Grill (aka Amorsolo). Nung patapos na kaming kumain ay nagyaya si Arlan na mag-overnight sa kanila sa Laguna. Agad na kinagat ni Cris ang offer ni Arlan at hindi nagtagal ay pumayag na rin kami ni Marc. Si Taysh nuna una ay sasama na pero sa kasamaang palad ay hindi siya pinayagan.

Kumusta naman! Para lang kami na nagkayayaan na pumunta sa mall at kami'y walang imik na pumayag. Pero hindi! Nagkayayaan kaming pumunta at mag-overnight sa Laguna!

Mga lampas alas-9 na kami umalis ng Amorsolo at sumaglit muna kami sa bahay ko tapos sa bahay ni Cris sa Katipunan upang makakuha kami ng damit at pera. At ayun na nga, gamit ang sasakyan ni Cris ay nag-roadtrip na kami at binagtas ang kahabaan ng C-5 at SLEX papunta kina Arlan sa Pacita, San Pedro, Laguna.

At pagdating kina Arlan ay nabigla kami sa transformation ng bahay nila. Nung huli kasi naming punta sa kanila ay ginagawa pa lang yung bahay nila pero ngayon ay fully finished na ang bahay. Hindi na namin masyadong makita ang bakas ng luma nilang bahay.

At ayun nga, pagkatapos ng kaunting pahinga ay nag-settle down na kami sa air-conditioned room ni Arlan at nag-videoke na all night hanggang 3:30 ng umaga. At pagkagising naming ng lampas 10 ay tuloy ang ligaya at tuloy ang kantahan habang hinihintay namin ang tanghalian. At pagkatapos kumain ay tuloy pa rin ang kantahan habang may hinihintay na file si Cris mula sa net na siyang hudyat ng aming pag-alis doon dahil babalik pa siya ng U.P. Mga lampas 1pm na kami umalis kina Arlan at mga alas-3 na kami nakarating ng Quezon City.

Standoff

Hi!! Pagbukas ko kanina ng telebisyon upang manood ng TV Patrol ay nagulat ako sa main story nila na may nagagaganap na isang hostage taking sa may Bonifacio Shrine, malapit sa may Manila City Hall. (For full story, click here.) Pero kakaiba ito sa karaniwang hostage drama na lagi nating napapanood o nababalitaan. Bukod sa isang bus na may laman na lampas 30 batang mag-aaral, ay ang kinagulat ko ay ang demand o dahilan ng hostage-taker kung bakit niyang nagawang i-hostage ang mga mag-aaral ng mismong day-care center na siya mismo ang nagpagawa at nagpapatakbo, at iyon ay ang mabigyan ng libreng edukasyon hanggang kolehiyo ang mga batang pinapag-aral niya, at ang isa pa ay ang pagsasaayos ng pag-allocate ng pondo ng bayan para sa programa sa edukasyon at para sa pagresolba sa kahirapan.

Ang naturang mga demands niya at ang pamamaraan niya upang maipalabas ang kanyang mga kairingan ang paksa ng aking post na ito.

May kasabihan tayo na "The end justifies the means." Para sa akin, hindi ito nararapat na prinsipyo sa buhay. Sang-ayon ako doon sa mga pinaglalaban ng hostage-taker pero kung gaano naman ako kasang-ayon doon ay ganoon rin naman ako hindi sumasang-ayon sa pamamaraan niya upang maipalabas ang kanyang mga hinaing sa mga kinauukulan. Wala akong maisip na tama at angkop na dahilan upang mang-hostage ka ng tao, lalo na ng lampas 30 batang mag-aaral na nasa 5 taong gulang pa lang maski na sabihin mo na para sa kanila rin itong ginagawang pangho-hostage, dagdagan mo pa ng pagdadala at pagpapakita ng baril at granada. Bagamat musmos pa lang yung mga bata at hindi pa nila lubos na naiintindihan ang mga pangyayari ay hindi pa rin ito sapat para ilagay sila sa ganoong sitwasyon.

Ayon sa balita ay talagang ma-prinsipyo ang hostage-taker at matagal nang tumutulong sa mga mahihirap sa Parola Compound sa Maynila. Nagpatayo at nagpapalakad pa nga siya ng isang day-care center doon. Tama na yung ginagawa niya. Mahirap umasa sa tulong ng pamahalaan maski anong kulit ang gawin mo kaya siya na mismo ang gumagawa ng paraan. Pero syempre, may limitasyon ang kaya niyang ibigay na tulong kaya talagang gobyerno pa rin ang dapat tumugon. Pero sa ginawa niyang pangho-hostage ngayong araw, lahat ng naipundar at ipinaglalaban niya ay mawawala. Ngayon ay nakakulong na siya at may kinakaharap na patong-patong na kaso. Imbes na makakatulong pa siya ay nawala na ito dahil nasa loob na siya ng rehas na bakal. Oo, maaari nating sabihin na mabibigyan ng libreng edukasyon yung mga mag-aaral na pinaglaban niya pero ang bilang nila ay kakarampot lamang. At sa ginawa niyang ito, parang wala na rin siyang pinagkaiba sa mga pulitikong kurap na nais niyang mawala dahil siya mismo, lumabag na rin sa batas. Sayang siya talaga. Kung hindi niya ginawa yun ay madami pa siyang matutulungan. At sira na rin ang kinabukasan niya.

Dahil diyan sa nangyaring hostage-taking na iyan ay nasa world spotlight na naman tayo sa maling pagkakataon. Covered ng CNN at ng iba pang international news organizations at buong pangyayari. Nasira na naman uli ang imahe ng Pilipinas. Pero siyempre, spotlight rin ang buong gobyerno dahil nagmistulang wake-up call at challenge ito na sagutin for the long-run ang mga basic at matagal nang problemang kinakaharap ng bansa.

Kung gagawa ka ng isang bagay, isipin mo muna ng ilang beses kung gagawin mo nga ba talaga yun. Isaalang-alang mo rin ang mga tao sa paligid mo. Isipin mo ang mga maaaring kahinatnan ng iyong gagawin, hindi lamang during o right after mong gawin yun, kundi pati ang long-term effect. Isipin mo talaga kung makakabuti nga ba o makakasama lamang ang gagawin mo maski ang mga layon mo ay maganda naman. Good intensions done in the wrong way may and will just backfire.

Bago ang Exams...

Hi!! Dahil lampas dalawang linggo na lang ang nalalabi sa 2nd sem, tambak na ang mga kailangang ipasa at gawin para sa iba't ibang asignatura at siyempre, hinding-hindi mawawala ang mga pagsusulit na matinding batayan kung makakakuha ka ng singko o pasado para sa isang asignatura. Kaya tuloy, bago kami "magpakamatay" sa darating na dalawang linggo, nagpasya kami na magpakasaya muna. Kanina ay nagkayayaan na pumunta kami ng SM North Edsa at manood ng sine tapos kumain pagkatapos.

Ang pinanood namin kanina ay ang pelikulang "The Hitcher" na kung ako ang iyong tatanungin ay hindi ko nirerekomendang panoorin dahil bukod sa madaming mahahalagang tanong na hindi nasagot, kulang ito sa character build-up at hindi rin maganda ang pagkakalahad ng istorya at ang actual presentation nito. Sayang, maganda pa naman yung konsepto. At kani-kanina ko lamang nabatid sa paghahanap ko sa internet na ang pelikulang ito ay remake ng isang 1980's na pelikula na may parehas na titulo. At base sa nabasa ko, walang binatbat itong bago. Gusto ko tuloy makahanap ng kopya ng orihinal na pelikula upang makilatis nang mabuti.

Pagkatapos naman ng exams ay muli kaming mabubuhay at ang sunod na destinasyon namin ay sa Puerto Galera para sa semender ng ERG. Kaya abangan, "Pagkatapos ng Exams..."